بعبع الثانوية العامة ده إخترعوه الأيام دي بس..أو علي الأصح يمكن من حوالي عشرين سنة ..وأنا باعتقد إنه مفتعل..علشان ترويج الدروس الخصوصية..جنبا إلي جنب مع إهمال المدرسين للشرح في الفصول أثناء اليوم الدراسي علشان المنظومة تكتمل..طبعا الكل بيعمل المستحيل علشان يعدي من المشكلة دي..إيه الحل ..الدروس ولا غير الدروس..ودليل علي كدة إن الأوائل كلهم إلا قليل جدا ذاكروا لوحدهم و اجتهدوا ووصلوا لما هم فيه..

أنا يمكن ذكرت قبل كده إن اللي كان بياخد دروس أيامنا ..كنا بنعزله لدرجة أحيانا الخصام..وكان من النادر إن تلاقي حد بياخد درس وبنسميهم الخايبين..

عام الثانوية العامة بالنسبة لنا كان عادي جدا و يمكن أسهل من ثانية ثانوي لأن كنا إتعودنا علي أفرع الرياضة الكثيرة..اللي كانت فيها إلي حد ما مشكلة..وكانت العملية مبسطة جدا ..يعني كل واحد حايذاكر و يجتهد ..و بإذن الله ربنا ينوله مايريد.و الفيصل في النهاية المجموع..مثلا أنا دخلت كلية الطب جامعة عين شمس بمجموع 79 % إلي جانب 3 % تفوق و مستوي رفيع في اللغة الإنجليزية ..فقط لاغير..ولم أعاني أي مشاكل في اللغة بعد كدة..دلوقت بنلاقي أولاد محموعهم فوق 100% واول مايدخلوا طب أو هندسة ..يعانوا الأمرين من اللغة وصعوبة المناهج عليهم ومنهم اللي بيرسبوا فعلا و لايستطيعون المواصلة..لأن يبدوا إن التعليم هو الآخر فقد الأصالة ..

يوم امتحان اللغة العربية استاذنا كان منتظرنا كلنا خارج اللجنة ..علشان يطمئن علينا و علي عمله طول العام…ياسلام..

انا فاكرة يومها راجع معايا سؤال سؤال..وقالي حتحصلي علي 49 من 60 في العربي وقد كان بالضبط ..و ده لأني تركت سؤال النحو تماما وده بناء علي توصيته قبل الامتحان ..يعرف أنني لاأعرف شيئ في النحو وأنني أكتب سماعي ..وكان لها قصة ..أني أكتب الانشاء و احصل فيه علي الدرجة النهائية ولا يزيد تقديري في النحو عن 1 او صفر..وظن أن شخصا ما بالمنزل يكتب لي موضوعات الإتشاء ولم يصدق إلا بعد ان اجلسني أمامه و امام مفتش اللغة العربية و طلب مني كتابة موضوع ..ليصل لنفس النتيجة ..ياسلام عليهم اساتذة و علي اهتمامهم وعلي حرصهم علي تلاميذهم ..

بالمناسبة استاذي العزيز..كان بالرغم من تفوقه في مادته إلا أنه كان له إتجاه فني نحو عبد الحليم حافظ من الناحية الشكلية فقط..فقد كان فيه بعض الشبه وكان يقلده إلي حد ما بطريقة اللبس و الكوفية الحرير..حتي أحيانا الحركات..لا أدري هل كان كذلك فعلا أم كان هذا ماتصوره لنا مراهقتنا..لكن بوجه عام كان إنسانا فاضلا بمعني الكلمة ومربيا برغم صغر سنه النسبي ..وهذا سيأتي الحديث عنه بعد..