Posted by: doctoraydy2008 | مارس 9, 2008

اللي بني مصر !!!!


كنا زمان , بنسمع مقولة  , اللي بني مصر كان في الأصل حلواني , يعني مصر جميلة و كلها ذوق , وده طبعا من ذوق اللي بناها , واللي بناها لأنه كان ذوق و كان برضه جدع و شهم , وكان ماتفوتهوش العيبة , وكل اللي ييجي منه , جميل , وحلو , مش أصله حلواني !!! ..

 كنت اليوم في وسط البلد .. اللي ماحد عارف لها وسط من طرف ..واقفة مع الناس الغلابة بانتظر الأوتوبيس المكيف في أي مكان في شارع القصر العيني ..و ده طبعا بسبب إن الخدمة أصبحت متميزة  .. مافيش إلتزام بمحطات .. مطرح ماتقف أقف ..وشاور ..و التساهيل علي اللي خلقنا..وطبعا لأن الخدمة متميزة ..ممكن الأتوبيس ييجي بس مايقفش … و يستخبي من ورا العربيات اللي جاي معاها لما الإشارة فتحت وييييجري ..وتشاور ماتشاور .. خلاص … أستني الخدمة المتميزة اللي بعده ..ماهو إذا كنا بننتظره في أي مكان .. من حقه هو كمان يقف في أي مكان .. وزي برضه لما تقوله نزلني في أي مكان ..خدمة متميزة !!! و طبعا من ضمن التميز إن الأوتوبيسات دي المفروض إنها مكيفة !!!! و المفروض إن حالتها من داخلها كويسة.. ده المفرووض !! .. لكن طبعا المفروض شيئ و اللي حاصل العكس تماما…لأ وكمان من داخلها علشان تستوعب أكبر عدد من السردين أقصد البني آدمين … قصروا المسافة اللي بين كل كرسي وما يليه و نقعد تتكسر رجلينا برضة مش مهم ..مش نحمد ربنا ..إيه ده الناس دي ..قبل ما آجي أقف مع الغلابة ..اللي السواح في الأوتوبيسات الفاخره أم عشر أدوار معديين علينا يتفرجوا علينا ..ما أحنا أحفاد الغلابة الفراعنة ..برضه ..اللي بنوا الهرم ..؟!..يعني من ضمن الآثار اللي في برناج الرحلة .. والله حاجة تغيظ .. المهم كنت في مصلحة حكومية .. يبدوا أنه قد تم تطويرها مؤخرا …وحطوا السيراميك و مستلزماتة .. ونسيوا ينبهوا علي الأساتذة العمال ينضفوا الأرضيات من الورق و الزبالة اللي عليها .. لكن حد يقدر يتكلم …لاهما نبهوا ولا أحفاد الحلواني عندهم دم ..برضة حاجة تغيظ ..خلصت مهمتي و نازلة في الأسانسير الجديد ..وطبعا متغاظة من السكرتيرة الي أعطت موعدد الساعة التاسعة و حضر رئيسها قبلها و هي ماجتش اللاالساعة العاشرة.. ولأن طبعا السكرتيرة أهم من رئيسها لأن معاها مفاتيح الشغل كله..ولأنها برضه من أحفاد الحلواني .. أضطرينا كلنا ننتظر ..مكره أخاك لا بطل ..قبل مايتحرك الأسانسير..عامل جاي يجري وشايل برميل زباله .. الراجل نشيط و مختلف عن زملاؤه الكسالي و نظف إدارته وملا البرميل زبالة من كل الأنواع..أكياس شيبسي..ورق ..زجاجات ..معرفش إيه..ملو برميل..وطبعا لأن كله ذوق ..ولأن سائق الأسانسير برضه ذوق ..نزل مع الركاب برميل الزبالة …كلنا عندنا ذوق .. طبعا اللي حايتنفس و يعترض سيحرم من الميراث و ينزل علي رجليه و طبعا بعد تشييعه بوصله ملحنه من الكلام الذوق …أد إيه إحنا ناس ذوق..

كل الحكاية دي عشان أوصل لأن الأوتوبيس عدي بينا من أمام مدرستي الابتدائية ..و طبعا ده مش مساره لكن هو بيختصر الطريق علشان الناس الغلابة اللي واقفة مستنياه علي المحطة ماتشوفوش ..ويمكن هو متأخر بيعوض التأخير ..عداه العيب ..ومش مهم يطقوا .. ماهي خدمة ممتازة زي ماقلنا و علي كيفنا و كيفه ..

ماكنتش شفت مدرستي من سنين طويلة من فوق من مستوي الأوتوبيس..يمكن أحيانا باعدي عليها في عربيتي لكن مش شايفة حاجة ..هو أنا في إيه واللا في إيه .. الواحد وهو سايق بيبقي في غيبوبة من اللي وراه و اللي قدامه .. إنما لقيتني النهاردةباشوفها من فوق و من جوه ..اكتشفت إن القصر الصغير الجميل إختفي في وسط مباني إضافية كثيرة تتعدي الأربعة ولا أدري هل مازال موجود أو تم هدمه ليحل محله هذه المباني الغير متناسقة قبيحة الشكل و الألوان و المنظر..واين الحديقة ؟؟؟.. أصبحت في خبر كان..و أين كل ما كان ..لاشيئ إلا قبح في قبح..حتي السور الحديدي ..الذي كانت علية أشجار خضراء وورود …والله ورود ..غير موجود .. وحل محله سور من البناء القبيح و عليه لافتات و كتابات أقبح ….يبدوا أنهم باعوه..ماهو حديد و الحديد غالي !!!!!!…علي فكرة نفس الشيئ حدث في سور مدرستي الثانوي لكن هذه حدث من سنين وله قصة أخري ربما تأتي بعد … مشاعر عديدة انتابتني..كئيبة ..يمكن ..قرفانة..جايز..حافرقع..هو كده..وتذكرت بيت شعر للجميل فاروق جويدة يقول ..لاأنت أنت ولا الزمان هو الزمان..و علي رأي الست ..قول للزمان إرجع يازمان ..والله يرحمك ياحلواني ياذوق ياللي بنيت زمان مصر اللي كان كلها ذوق……….


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: