Posted by: doctoraydy2008 | مارس 11, 2008

رغيف عيش ديجيتال


كان في فترة ما سابقة  ..من المعجزات أن أسمع حرارة في التليفون ..و بالتالي لن أستطيع تدوير القرص قبل مايبقي زراير..كان شيئ من رابع المستحيلات.. و أطلب اي نمرة .. مش ممكن .. دلوقت الحمد لله مافيش أحسن من التليفونات و الاتصالات ..كله ديجيتال و ميت فل و تسعة و تسعين ..ياريت يعملوا لنا رغيف عيش ديجيتال و يحلوا المشكلة.. المسألة بس عايزة شوية خيال علمي … و العلماء بتوعنا اللي مش لاقيين شغل ..يفكروا شويتين و هي حاتيجي معاهم علي طول.. ممكن يكون الرغيف ديجيتال و نشوفة و نشبع بالإيحاء ..أو يزرعوا القمح ديجيتال..و لحد مانوصل للرغيف  الخارج من الفرن  الديجيتال برضه..ولأن ماكانش فيه أصعب من مشكلة الاتصالات.. يبقي مش صعب مسألة الخبز دي .. و أهي إتحلت مشكلة الاتصالات..و مابقاش فيه أكتر من التليفونات .. زمان برضة لما الواحد كان يتزنق في أي مشكلة كان يدور في شارع طويل عريض علي تليفون واحد يكلم منه أهله مايلاقيش ..دلوقت التليفون في يد كل مواطن .. حتي الفلاح في الغيط عامله كيس و معلقه علي ودن اللامؤاخذة الحمار و سارح بيه في الغيط.. ولكن من فرحتنا من إنها إتحلت ..معدناش عارفين نسيطر علي نفسنا من الفرحة ..ولما نطلب أي رقم نفرح إنه رد ..لكن يبدوا إنها يافرحة ماتمت..ياولينا لو طلبنا شركة من شركات خدمة النت السريعة..و انا إتعقدت من أي حاجة إسمها خدمة سريعة و خدمة متميزة و خدمة العملاء..ترد عليه الرسالة إذا كنت عايزة مش عارف إيه إضغطي واحد ..ثم إثنين .. وفي الآخر نوصل للرسالة المهمة ..جميع مندوبينا مشغولين الآن ..سيقوم أحد عملائنا بالرد عليكم فورا ( ولا أدري هل مندوبيهم من العملاء و الا هما حايسيبوا العملاء علي بعض يخلصوا من بعض بعيد عن دماغهم ).. المهم كل دقيقتين تتكرر نفس الرسالة و أكون محظوظة لو رد علي أحد العملاء دول بعد نصف ساعة .. وطبعا ساعتها مش حااقدر أملك نفسي الا و أروح قايلة ..هيييييييييييييييييييه.. أخير حد عبرني ..المهم حصل لي الموضوع ده النهاردة .. وبعد ما اشتكيت له و الحقيقة كتر خيره كان صبور عليه و فكيت معاه الراوتر المتوصل بالكومبيوتر علشان النت 3 مرات .. و في الآخر قاللي أنا كدة خلصت حا أحول حضرتك لزميل تاني علشان يضبط معاكي و نضبطعليكم كلمة السر .. و أنا صدقته .. و عنها ربع ساعة و الرسالة تقولي إن حايرد عليه حد من خدمة العملاء ..طيب أنا مش عايزة خدمة العملاء .. أنا عايزة الدعم الفني ..طبعا إضطريت التكلم تاني و ابتدي مشوار العذاب من تاني و الرسالة إياها لحد ماحد رد عليه ..وطبعا ابتدي المشوار من جديد و في الآخر قاللي لابد تشيلي الويندوز و تحطيه تاني لو عازة تشغلي الراوتر ده ( طبعا أنا شارياه من خارج الشركة..و إذا عرف السبب بطل العجب) .. طبعا صرخت..وقلت مييييييييييش ممكن… قاللي آسف يافندم .. يبقي لازم ترجعيه و تستخدمي الخاص بالشركة…أظن كدة وضحت الرؤية..نستخدم راوتر الشركة وياإما نشتريه يانأجره..ونفضل فاتحين الخط بالساعات علشان تتحسب علينا مكالمات..و الفاتورةتتخن وتزقلط ..وجيبنا يفضي..آدي آخرة الديجيتال..و طبعا غالبا هو ده اللي حايحصل لو توصل العلماء للرغيف الديجيتال .. يبقي خلينا بقي في اللي نعرفه..و اللي نعرفه أحسن من اللي مانعرفوش ….ويادار مادخلك شر..


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: