Posted by: doctoraydy2008 | مايو 1, 2008

البعبع..الاسم الحركي للثانوية العامة..وعبد الحليم حافظ


بعبع الثانوية العامة ده إخترعوه الأيام دي بس..أو علي الأصح يمكن من حوالي عشرين سنة ..وأنا باعتقد إنه مفتعل..علشان ترويج الدروس الخصوصية..جنبا إلي جنب مع إهمال المدرسين للشرح في الفصول أثناء اليوم الدراسي علشان المنظومة تكتمل..طبعا الكل بيعمل المستحيل علشان يعدي من المشكلة دي..إيه الحل ..الدروس ولا غير الدروس..ودليل علي كدة إن الأوائل كلهم إلا قليل جدا ذاكروا لوحدهم و اجتهدوا ووصلوا لما هم فيه..

أنا يمكن ذكرت قبل كده إن اللي كان بياخد دروس أيامنا ..كنا بنعزله لدرجة أحيانا الخصام..وكان من النادر إن تلاقي حد بياخد درس وبنسميهم الخايبين..

عام الثانوية العامة بالنسبة لنا كان عادي جدا و يمكن أسهل من ثانية ثانوي لأن كنا إتعودنا علي أفرع الرياضة الكثيرة..اللي كانت فيها إلي حد ما مشكلة..وكانت العملية مبسطة جدا ..يعني كل واحد حايذاكر و يجتهد ..و بإذن الله ربنا ينوله مايريد.و الفيصل في النهاية المجموع..مثلا أنا دخلت كلية الطب جامعة عين شمس بمجموع 79 % إلي جانب 3 % تفوق و مستوي رفيع في اللغة الإنجليزية ..فقط لاغير..ولم أعاني أي مشاكل في اللغة بعد كدة..دلوقت بنلاقي أولاد محموعهم فوق 100% واول مايدخلوا طب أو هندسة ..يعانوا الأمرين من اللغة وصعوبة المناهج عليهم ومنهم اللي بيرسبوا فعلا و لايستطيعون المواصلة..لأن يبدوا إن التعليم هو الآخر فقد الأصالة ..

يوم امتحان اللغة العربية استاذنا كان منتظرنا كلنا خارج اللجنة ..علشان يطمئن علينا و علي عمله طول العام…ياسلام..

انا فاكرة يومها راجع معايا سؤال سؤال..وقالي حتحصلي علي 49 من 60 في العربي وقد كان بالضبط ..و ده لأني تركت سؤال النحو تماما وده بناء علي توصيته قبل الامتحان ..يعرف أنني لاأعرف شيئ في النحو وأنني أكتب سماعي ..وكان لها قصة ..أني أكتب الانشاء و احصل فيه علي الدرجة النهائية ولا يزيد تقديري في النحو عن 1 او صفر..وظن أن شخصا ما بالمنزل يكتب لي موضوعات الإتشاء ولم يصدق إلا بعد ان اجلسني أمامه و امام مفتش اللغة العربية و طلب مني كتابة موضوع ..ليصل لنفس النتيجة ..ياسلام عليهم اساتذة و علي اهتمامهم وعلي حرصهم علي تلاميذهم ..

بالمناسبة استاذي العزيز..كان بالرغم من تفوقه في مادته إلا أنه كان له إتجاه فني نحو عبد الحليم حافظ من الناحية الشكلية فقط..فقد كان فيه بعض الشبه وكان يقلده إلي حد ما بطريقة اللبس و الكوفية الحرير..حتي أحيانا الحركات..لا أدري هل كان كذلك فعلا أم كان هذا ماتصوره لنا مراهقتنا..لكن بوجه عام كان إنسانا فاضلا بمعني الكلمة ومربيا برغم صغر سنه النسبي ..وهذا سيأتي الحديث عنه بعد..


Responses

  1. دكتوره ،، السلام عليكم
    بالنسبة للي جايبين 100% وفي الاخر بيعانوا من صعوبه المناهج ده بسبب الحفظ ، يمكن التعليم بتاعنا معودناش ازاي نفكر ، او نبحث وده شئ مفقود في تعليم مصر ،، دلوقتي اللي عايز “يفهم ” مش مجرد شهاده وبس . لازم يدفع فلوس يعني يتعلم بالخارج علشان ” يعرف معنى كلمه تفكير و بحث ويعمل حاجه مفيده في الحياه ” لكن طول ما احنا في المستنقع التعليمي المصري صعب تلاقي حد بيفهم دلوقتي ،،

  2. عليكم السلام أهلا و مرحبا..طبعا باحترم رأيك جدا.و أنا الحقيقة مش عارفة المناهج هل تم تغييرها عن أيامنا أم لا..لكن باعتقد إن مهما المناهج إتغيرت المشكلة الأكبر في طرق التدريس مع إني باسمع إن دلوقت كل المدرسين مؤهلين عالي و بيتم تدريبهم ..لكن يبدوا إنهم بيدربوهم علشان يعطوا دروس خصوصية مش العكس…فيه أزمة ضمير عالية جدا..زمان كان مدرسيننا معظمهم مؤهل متوسط و قليل منهم المؤهل العالي لكن كانوا متمكنين و علمونا كويس و كمان علمونا إزاي نفكر..يعني كان عندنا دزئية إسمها التمارين العقلية اللي هي تجاوب المسائل الحسابية بدون ورقة و قلم و دي اساس البرنامج الموضة بتاع الأيام دي بتاع ال UC math ..;..كان عندهم ضمير و أداء عالي ..

  3. الصراحة كثيرا ما سمعنا عن مثل هؤلاء الأساتذة.. لكننا يوما بعد يوم، نتأكد أنهم ليسوا -بالنسبة لجيلي (الجيل الخايب..ههه)- سوى أساطير يونانية.. للأسف!!

  4. شكرا جزيلا لمتابعتك..طبعا معاك حق ..لكن بالتأكيد إن في منهم موجودين لكن طوفان الفساد إما جرفهم بعيدا ..أو تواروا هم بإرادتهم خوفا من أن يجرفهم في تياره..لكن أكيد موجودين..هل أقلية ..هل طثيرين ..لا استطيع أن أجزم..


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: