Posted by: doctoraydy2008 | أكتوبر 30, 2008

الجنيه غلب الكارنيه……


عندما وصلت وجدت بالوحدة زميل لي  من الكلية تسلم المجموعة كطبيب ثاني ..وما أن رآني حتى قفز وجاء إلي جريا .. وقام بالترحيب و الاستقبالات الكبيرة..معذور ماشافش حد من كام يوم..وانا مجربة و مقدرة الحالة اللي هو فيها.. صنع لي شايا وأخرجت ما كان معي من طعام جئت به من القاهرة كان بالنسبة له المسكين إفطار 9 نجوم ..وجلسنا  ننتناول الإفطار معا ..حتى  وصل باقي فرقة الوحدة المدرعة  من طبيبة و موظفين..

أرادت الطبيبة الأولي ان تخدمني  بان تؤجل إخلاء طرفي حتى انتهي من جميع إجراءاتي و أوراقي و أظل علي ذمتها حتى لا يجد المدير الكبير أي حجة لممارسة هواياته المؤذية..وقالت لي اتركي حقيبتك هنا و انطلقي ..وأقسمت علي أن أبيت عندها طبعا شكرتها و رفضت!! ..أتناول الغذاء معها ..أيضا رفضت.!!. كنت أحس إنني ملخبطة مش عارفة أبدا منين..قلت لها مش وقت ده كله..

اخدت ديلي في سناني علي رأي أولاد البلد وطرت علي الإدارة الطبية في قنا ..ذهبت إليها في سيارة نقل ..كانت مجازفة لكن ربنا ستر..وكان السائق مهذبا جدا ورفض تقاضي أي اجر..وأوصلني إلي باب الإدارة الطبية ..علي فكرة دي من أهم سمات أهل الصعيد..إكرام الغريب و معاونته..

دخلت للمدير رأسا.. الذي قال لي بدون ان ينظر إلي أو حتى يعرف ماذا أريد ..روحي استلمي العمل أولا وبعدين اتنقلي زي ما أنتي عايزة..زي مايكون مغتاظا مني..قلت له يادكتور ..إنا منقولة لمحافظة ثانية ..ازاي استلم و بعدين اسلم ( استلم الوحدة التي وزعت عليها و أنا غائبة في القاهرة ) و ارجع استلم تاني في مكان تاني ..طبعا لم يعيرني أي اهتمام ..كنت حا أتجنن..إيه ده..؟؟؟….عملت هيصة وزمبليطة..وقلبت الدنيا علي دماغه ودماغ المديرية كلها..اتاريه منقول بجزاء وحالته كرب وعليه تحقيقات كثيرة ومتضايق و حايفرقع..رحت رايحة علي المحافظة وقلت حا اطلب مقابلة المحافظ….لم أتمكن من مقابلته طبعا..

حاولوا يصبروني وقالوا لي المدير الجديد جايز يتسلم العمل الخميس أو السبت..ورفضوا الاعتراف بصورة القرار الموجودة معي مع أن القرار الأصلي و صلهم بالتأكيد..وهكذا بدا أول درس في التحايل و الاستهبال الحكومي الذي لم أكن افهمه في تلك الأيام و علي رأي اللي بيقولوا …الجنيه غلب الكارنيه ..لكنني لم أكن افهم هذه الأشياء و حتى لو كنت فهمتها لم أكن سأتعامل بها و لو انطبقت السماء علي الأرض لكن علي الأقل أكون فاهمة ما يجري ..ومع ذلك كانوا مستعجبين كيف استلم و اسلم واخلي في أربعة أيام ..مش المفروض أشوف الويل شويه..؟؟؟ ..منطق في منتهي العجب ..وسمعت من تحت لتحت إني لو استلمت مش ممكن اخلي قبل 6 اشهر ..

طبعا كنت متصورة أنني سأصل قنا و أخلي طرفي في نفس اليوم و أعود في القطار العائد..طبعا منتهي العبط..!!! مش عارفة إنا كنت فاكره نفسي فين..!!! ومش عاملة حسابي لا في نقود ولا ملابس حتى يوم السبت اللي بيقولوا عليه ده..معي فقط 12 جنيه و نصف ( علي فكرة ده كان مبلغ لا بأس به في تلك الأيام التي كانت فيها الثلاث بيضات بقرش واحد..الآن البيضة الواحدة تبدأ ب 35 قرش ) ..وبيني و بين القاهرة 670 كيلومتر..و14 ساعة زمن و القطار ب 5 جنيهات لأذهب و أعود و معي نقودا و ثيابا..كيف أتصرف في هذا الموضوع…؟؟؟؟و المسئولين ودن من طين و أخري من عجين..وخرجت من المحافظة أو الادارة الطبية مش دارية أنا خرجت من مين فيهم..أدور علي مكان أبات فيه ……!!!


Responses

  1. فعلا اول مرة علي الانترنت اقابل بنت مصرية بجد انا بقالي علي النت اكتر من 7سنين بس بجد اول مرة اقابل بنت مصرية بجد
    وكم جميلا ان اسمع كلام مثل كلامك ده جميل ان تتركي شيئا ما عن حياتك في مكان معين او علي الانترنت حتي تتذكري هذه الايام ..يوما ما انا وضعتها لكن في مجلدات عندي في منزلي لكن بصراحة عندي كسل او خمول اني لسه هقعد اكتب بقي 😀
    فبقول بلاش يعني وقت تاني
    انا كنت علي الانترنت ملقب باسم فارس بلا جواد ويوما ما سيتذكرونني وانا بهدي اليكي هذا اللقب …يوما ما سيتذكرونني ….
    جميل ان تضعي شيئا نتذكرك به ونفكر فيه دائما وابدا
    اكملي المسيرة لعل اقرب الناس اليكي يقرا ما تكتبي يوما ما
    تحياتي لكي يا بنت مصر وطبيبتها

  2. بتفكرني لما سافرت مرة السعودية للعمل كأستاذ زائر..كانوا بيطلقوا علي اسم الفرعونة..لكن بجد لقبك انت الأجمل ..فارس ..واتمني ان تكون بجواد يساعدك علي الخوض في طرق الحياه الصعبة ..علي فكرة أنا أحب الخيل جدا..في شكلها أصالة و رشاقة..وفي اعينها طيبة و صدق..وأحيانا أشعر أن نظرتها فيها حكمة و فلسفة ..مجرد أحاسيس أو تخيلات..نورت و آنست..


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: